Òganizasyon feminis MARIJÀN ap patisipe ankò ane sa a nan mobilizasyon mondyal kont vyolans sou fanm ak tifi atravè yon seri aktivite k ap fèt soti 25 novanm rive 10 desanm 2024 nan Pòtoprens, nan kad kanpay entènasyonal 16 jou aktivis la, sou tèm : « Riposte epi rekonstwi tèt ou aprè vyolans. »

Nan kad 16 jou aktivis la, MARIJÀN vle souliye reyalite fanm ak timoun an Ayiti ap fè fas, ki deplase anndan pwòp peyi yo akòz konfli ak ensekirite. Fanm sa yo ki souvan pa gen aksè ak lasante, sekirite ak edikasyon, sibi yon vyolasyon grav dwa fondamantal yo. Nan yon kontèks nasyonal ekstrèmman frajil, fanm yo pran nan pyèj yon vyolans sistemik, agrave paske Leta pa janm fè anyen kont sa, e li ekspoze yo ak abi konstan e menm lanmò.

Li inakseptab pou gouvènman an kontinye fèmen je sou soufrans fanm ak tifi yo. Li dwe imedyatman retabli sekirite, tounen nan lòd konstitisyonèl yo epi garanti aksè a lajistis san diskriminasyon ni reta. MARIJÀN mande parite nan enstitisyon gouvènmantal yo, pa kòm yon chwa, men kòm yon dwa fondamantal. Li lè pou gouvènman an finalman montre li responsab pou aksyon li yo epi pran mezi konkrè kont kòripsyon, pandan l ap asime responsablite li fas ak enpinite ki pwoteje agresè yo. Fanm ayisyèn yo merite plis pase pwomès vid: yo mande aksyon imedyat ak solisyon dirab pou mete fen nan vyolans ak inegalite yo.

Jodiya, òganizasyon feminis an Ayiti yo ap lite san pran souf, souvan san finansman, fas ak gwo defi: feminisid, kòripsyon, vyolans ki gen rapò ak ensekirite jeneralize, mank aksè ak resous, prekarite ak absans edikasyon. Nan kontèks sa kote tout sistèm nan dwe reyenvante, 16 jou aktivis yo se yon opòtinite esansyèl pou denonse enjistis sa yo, ranfòse solidarite epi aji an favè yon avni ki pi jis pou tout moun.

Pou make 16 jou aktivis yo, MARIJÀN prezante yon seri aktivite ki vize sansibilize ak mobilize malgre defi ki gen rapò ak rediksyon drastik espas fizik pou aksyon sitwayen. Inisyativ sa yo ap pran fòm atelye entèraktif, panèl diskisyon, sansibilizasyon kominotè sou tèren ak sou entènèt.

Nan yon sosyete kote vyolans sou fanm ak tifi twò souvan banalize, MARIJÀN mande yon mobilizasyon san konpwomi, paske pa gen okenn tolerans posib fas ak vyolans ki baze sou sèks. Aksyon li yo, menm jan ak sa chak sitwayen ak enstitisyon, esansyèl pou konstwi yon avni kote dwa ak sekirite fanm ak tifi se yon priyorite absoli, san konpwomi.